2011, നവംബർ 10, വ്യാഴാഴ്‌ച

ആമ




ഗാഢ മൌനത്തിന്റെ ഇരുട്ടില്‍
പഞ്ചേന്ദ്രിയങ്ങളെ അടക്കി
നിസംഗതയുടെ പുറന്തോടിനുള്ളിലൊളിച്ച്
മയക്കത്തിലാണ്ട് ആമ

സഹജവാസനയാല്‍
ഏതൊ ഒരു നിമിഷത്തില്‍
നിസംഗതയുടെ
പുറന്തോടിനുള്ളില്‍ നിന്നും
പുറത്തേയ്ക്കു തലനീട്ടി

കത്തുന്ന വെയില്‍
ചോര മണക്കുന്ന കാറ്റിന്റെ ഇരമ്പം
ഓടിത്തളര്‍ന്ന ഇരകളുടെ നിലവിളി
വേട്ടക്കാരുടെ കുതിപ്പും കിതപ്പും

തലയും കൈകാലുകളും
ഉള്ളിലേയ്ക്കു വലിച്ച്
മൌനത്തിന്റെ അഗാധതയിലേക്ക്
ആണ്ടിറങ്ങുമ്പോള്‍
മനസ്സു മന്ത്രിച്ചു

നിഷ്ക്രിയത്വത്തിന്റെ
നിസ്സഹായതയില്‍
അശാന്തിയുടെ
നെരിപ്പോടിനുള്ളില്‍
വെന്തുരുകുന്നതിനെക്കാള്‍
ഭേദം ഇതാണ്

ഈ ഇരുട്ട്
ഈ മൌനം
ഒന്നും കാണാതെ
ഒന്നും കേള്‍ക്കാതെ
ഈപുറന്തോടിനുള്ളില്‍... തലപൂഴ്ത്തി...


Copyright © 2011 - rosebastin.blogspot.com. All rights reserved except for the image.
Image source here